وفاقی حکومت کا کپاس کے کاشتکاروں کے لئے10ارب روپے سے زائد کے پیکج کا اعلان
کپاس کے کاشتکاروں کے لئے وفاقی حکومت کی جانب سے وزیر اعظم کے اعلان کردہ زرعی پیکج کے تحت10ارب روپے سے زائد کے ایک بڑے پیکج کا اعلان کر دیا گیا ہے۔
جس کے تحت چاروں صوبوں کے کپاس کے کاشتکاروں کو کھاد،بیج اور زرعی زہروں پر سبسڈی فراہم کی گئی ہے اور اس کے علاوہ زرعی ترقیاتی بینک سے لئے گئے قرضوں میں بھی خصوصی رعائت حاصل ہوگی۔
یہ بات وائس پریذیڈنٹ پاکستان سنٹرل کاٹن کمیٹی ڈاکٹر محمد علی تالپور نے اپنے ایک بیان میں کہی ہے۔ انہوں نے کہا کہ وزارت نیشنل فوڈ سیکیورٹی کے وفاقی وزیر سید فخر امام، سیکریٹری نیشنل فوڈ سیکیورٹی غفران میمن اور اعلی آفیسران کی جانب سے کئی ماہ سے جاری کپاس کے کاشتکاروں کے لئے ایک خصوصی پیکج تیار کیا جارہا تھا جس کے تحت آج صوبوں کو فنڈز ریلیز کر دئے گئے ہیں اورتمام صوبے اپنی صوابدید اور طریقہ کار کے مطابق کپاس کے کاشتکاروں کو سبسڈی فراہم کریں گے۔
تفصیلات کے مطابق کپاس کے کاشتکاروں کو ڈے اے پی کی مد میں پنجاب کو 5ارب،خیبر پختونخواہ کو127ملین،بلوچستان کو430ملین جاری کر دئے گئے ہیں جبکہ سندھ کے لئے2.7ارب روپے رکھے گئے ہیں۔ ڈے اے پی کی مد میں دی جانے والی سبڈی کے تحت کاشتکار 1500روپے فی بیگ پر سبسڈی حاصل کر سکیں گے۔ کپاس کے بیج پر کل 3ارب روپے کی سبسڈی رکھی گئی ہے۔
