ایمرسن یونیورسٹی میں شہد کی پیداوار کا منفرد منصوبہ، "آرٹیزنل ہنی” کے نام سے آغاز
ایمرسن یونیورسٹی ملتان نے علمی جدت اور کاروباری مہارتوں کے فروغ کی جانب ایک اہم قدم اٹھاتے ہوئے شعبہ بائیولوجیکل اینڈ انوائرمنٹل سائنسز کے تحت شہد کی پیداوار کا منفرد منصوبہ کامیابی سے شروع کر دیا ہے۔
اس منصوبے کی قیادت قابل احترام وائس چانسلر پروفیسر ڈاکٹر محمد رمضان کی سرپرستی میں کی جا رہی ہے۔ یہ منصوبہ یونیورسٹی کے ماٹو "سیکھو تاکہ حلال رزق کما سکو” کے عین مطابق ہے، جو طلبہ کو تعلیم کے ساتھ خود انحصاری کی طرف راغب کر رہا ہے۔
اس منصوبے کے تحت شعبے کے سربراہ ڈاکٹر احمد وقاص کی قیادت میں طلبہ کو قدرتی طریقے سے شہد کی مکھیوں کی افزائش کے حوالے سے تربیت دی گئی۔ ابتدا میں صرف تین بکسوں سے "آرٹیزنل ہنی” کے برانڈ کے تحت 12 کلو گرام خالص شہد تیار کیا گیا۔ اس کامیابی کو مدنظر رکھتے ہوئے منصوبے کو مزید وسعت دی گئی ہے اور اب 50 اضافی بکسے شامل کر دیے گئے ہیں تاکہ پیداوار میں اضافہ کیا جا سکے اور یونیورسٹی کے تحقیقی اور کاروباری امکانات کو فروغ دیا جا سکے۔
یہ منصوبہ طلبہ کو شہد کی پیداوار کے سائنسی پہلوؤں کی عملی تربیت فراہم کرتا ہے اور انہیں کاروباری مہارتیں سکھاتا ہے تاکہ وہ چھوٹے پیمانے پر اپنے کاروبار قائم کر سکیں۔ کلاس روم کی تعلیم اور عملی تجربے کے امتزاج کے ذریعے یہ منصوبہ نہ صرف طلبہ کی تعلیمی قابلیت میں اضافہ کرتا ہے بلکہ انہیں حقیقی دنیا کے کاروباری چیلنجوں کے لیے بھی تیار کرتا ہے۔
وائس چانسلر پروفیسر ڈاکٹر محمد رمضان نے ڈاکٹر احمد وقاص اور ان کی ٹیم کی کاوشوں کو سراہتے ہوئے کہا، "یہ کامیابی شعبے کی محنت اور اختراعات کے فروغ کے عزم کا ثبوت ہے۔ یہ منصوبہ طلبہ کو پائیدار روزگار کے مواقع فراہم کرنے کے ہمارے مشن کی عکاسی کرتا ہے۔” ہنی” کے نام سے شہد کی پیداوار کا یہ منصوبہ ایمرسن یونیورسٹی کی علمی برتری اور عملی اطلاق کے امتزاج کا ایک سنگ میل ہے۔ یہ دیگر شعبوں کے لیے ایک مثالی منصوبہ ثابت ہو سکتا ہے جو تعلیم کو آمدنی پیدا کرنے والے منصوبوں کے ساتھ منسلک کرنے کی خواہش رکھتے ہیں۔
