کلرکوں اور اساتذہ کی اٹیچ منٹ فوری طور پر ختم کرنے کا فیصلہ

محکمہ سکولز ملتان کے دفاتر میں اٹیچ منٹ پر کام کرنے والے کلرک اور اساتذہ کو فوری طور پر اپنے اصلی مقام پر رپورٹ کرنے کی ہدایت کر دی گئی ہے۔

اس سلسلے میں سی ای او ایجوکیشن شمشیر خان نے مراسلہ جاری کیا ہے کہ کچھ کلرک اور اساتذہ اپنی ڈیوٹی سکولوں کے بجائے دفاتر میں سر انجام دے رہے ہیں، جو قوانین کے خلاف ہے ۔

اس لئے عارضی طور پر کام کرنے والے ان کلرکوں اور اساتذہ کے احکامات منسوخ کئے جاتے ہیں، اور ان کو اپنے اصل مقام پر رپورٹ کرنے کی ہدایت کی جاتی ہے، خلاف ورزی کرنے پر کارروائی کی جائے گی۔

تاہم ایسے اساتذہ اور کلرک جن کو خصوصی اسائنمنٹ دی گئی ہے، ان پر یہ احکامات لاگو نہیں ہوں گے۔