نواز شریف اور زرداری کو چور نہ سمجھنا قیامت کی نشانی ہے:عمران خان
پاکستان تحریک انصاف کے چیئرمین اور سابق وزیر اعظم عمران خان کا کہنا ہے کہ نواز شریف اور آصف علی زرداری کو چور نہ سمجھنا قیامت کی نشانی ہے۔
عمران خان نے مردان میں جلسے سے خطاب میں کہا کہ زرداری اور شریف خاندان 30 سال سے ملک کو لوٹ رہے ہیں، ان کی کرپشن کی وجہ سے سیاست میں آیا، مجھ پر ہر روزن ئی ایف آئی آر کٹتی ہے اور میں ضمانت لیتا ہوں، جس قوم پر چور مسلط ہوں اس کا کوئی مستقبل نہیں۔
چیئرمین پی ٹی آئی نے کہا کہ نواز شریف نے اپنے دور اقتدار میں 17 فیکٹریاں بنائیں، میں نے ساڑھے 3 سال میں دادا اور باپ کی زمین بیچی، کوئی ایک بتائے کہ میں نے ایک بھی فائدہ اٹھایا ہو، چیلنج کرتا ہوں کسی وزیراعظم نے آفس میں اتنا کم پیسہ خرچ نہیں کیا ہوگا۔
سابق وزیر اعظم نے کہا کہ تمام پاکستانیوں سے کہتا ہوں کہ یہ ملک کا فیصلہ کن وقت ہے، ہم نے اس وقت جہاد نہ کیا تو ان چوروں اور ان کے بچوں کی غلامی کریں گے، یہ قوم ایک مقروض اور غلام قوم بن جائے گی، ہم ان کے خلاف جہاد اور مقابلہ کریں گے۔
عمران خان نے کہا کہ آپ کو کال دوں گا عوام کا سمندر ہوگا، ملک کو حقیقی طور پر آزاد کریں گے۔
