مافیاز نے اپنا تسلط برقرار رکھنے کیلئے لاقانونیت کو فروغ دیا، عمران خان

چیئرمین تحریک انصاف عمران خان کا کہنا ہے کہ مافیاز نے اپنے تسلط کے دوام کیلئے ادارے تباہ کیے، اور لاقانونیت کو فروغ دیا۔

سابق وزیراعظم اور چیئرمین تحریک انصاف عمران خان سے ملک بھر کی اہم بار ایسوسی ایشنز کے صدور نے ملاقات کی ہے، جس میں دستور وجمہوریت کی بقاواستحکام کیلئے اشتراک عمل کی مختلف جہتوں پر تبادلہ خیال کیا گیا۔

ملاقات کرنے والوں میں اسلام آباد ہائیکورٹ نے صدر شعیب شاہین، لاہور بار، فیصل آباد بار، سرگودھا بار سمیت پنجاب کی دیگر بار کے صدور شامل تھے، جبکہ پی ٹی آئی کے رہنما شاہ محمود قریشی، فواد چوہدری، فرخ حبیب اور حسان نیازی بھی اس موقع پر موجود تھے۔

بار صدور نے ملک میں آئین وقانون کی بالادستی کیلئے عمران خان کے وژن اور کاوشوں کو خراج تحسین پیش کیا، اور مقتدر سیاسی اتحاد کی جانب سے ججز کیخلاف نفرت آمیز مہم پر تشویش کا اظہار کیا۔

اس موقع پر گفتگو کرتے ہوئے سابق وزیراعظم عمران خان نے کہا کہ قانون کی حکمرانی ترقی کے ایجنڈے کا بنیادی نکتہ ہے، تحریک انصاف عدل وانصاف کے قیام کیلئے 26 سال سے متحرک ہے، طاقتور اور کمزور کو یکساں قانون کے تابع کیے بغیر ملکی ترقی ممکن نہیں۔

عمران خان نے کہا کہ مافیاز نے اپنے تسلط کے دوام کیلئے ادارے تباہ کیے اور لاقانونیت کو فروغ دیا، وقت آگیا ہے نظام عدل اپنی توجہ قانون شکنوں اور مجرم اشرافیہ پر مرکوز کرے، وکلاء برادری ملک میں قانون کی بالادستی کیلئے آگے بڑھے اور اپنا کردار ادا کرے۔