اساتذہ کی ترقیوں کے کیسز میں موجود ابہام دور کرنے کی ہدایت
ڈائریکٹوریٹ آف پبلک انسٹرکشن (سیکنڈری ایجوکیشن ) پنجاب نے صوبہ بھر میں اساتذہ کی ترقیوں کے کیسز میں موجود خامیوں کو دور کرنے کے لیے ہنگامی ہدایات جاری کر دی ہیں۔
جاری مراسلے کے مطابق گریڈ 16 سے 17 میں ترقی پانے والے سینئر سبجیکٹ ٹیچرز کے کیسز کی جانچ پڑتال کے دوران مختلف دستاویزی نقائص سامنے آئے ہیں جنہیں فوری طور پر دور کرنے کا حکم دیا گیا ہے۔
مراسلے میں تمام چیف ایگزیکٹو آفیسرز اور ڈسٹرکٹ ایجوکیشن آفیسرز کو ہدایت کی گئی ہے کہ وہ متعلقہ اساتذہ کے ترقیاتی کیسز کا فوری جائزہ لیں اور تمام ضروری دستاویزات کی تکمیل یقینی بنائیں۔
ان دستاویزات میں “نو انکوائری/نو ڈیمانڈ/نو آڈٹ پیرا سرٹیفکیٹ”، تقرری و ترقی کے تصدیق شدہ آرڈرز، متعلقہ سالوں کی مکمل اے سی آر ، تعلیمی اسناد کی تصدیق اور دیگر ضروری کاغذات شامل ہیں۔
حکام نے واضح کیا ہے کہ تمام خامیوں کی درستگی کے بعد مکمل کیسز کو ترجیحی بنیادوں پر ڈائریکٹوریٹ بھجوایا جائے تاکہ انہیں پری ڈیپارٹمنٹل پروموشن کمیٹی کے آئندہ اجلاس میں پیش کیا جا سکے۔
مراسلے میں خبردار کیا گیا ہے کہ نامکمل یا ناقص کیسز ہرگز ارسال نہ کیے جائیں، بصورت دیگر تاخیر کی صورت میں متعلقہ ضلعی دفاتر کو ذمہ دار ٹھہرایا جائے گا۔
ڈائریکٹوریٹ نے اس معاملے کو “انتہائی ہنگامی” قرار دیتے ہوئے فوری عملدرآمد کی تاکید کی ہے، جس سے اساتذہ کی ترقیوں کا عمل تیز اور شفاف بنانے کی کوشش کی جا رہی ہے۔
