فیڈرل بورڈ کا بڑا فیصلہ سامنے آگیا
فیڈرل بورڈ آف انٹرمیڈیٹ اینڈ سیکنڈری ایجوکیشن نے سکیورٹی صورتحال اور علاقائی حالات کے پیشِ نظر ایران سمیت چار خلیجی ممالک میں میٹرک کے امتحانات ملتوی کرنے کا اعلان کر دیا ہے۔
بورڈ کی جانب سے جاری نوٹیفکیشن کے مطابق ایران، کویت، متحدہ عرب امارات اور بحرین میں میٹرک کے جاری امتحانات کو تاحکم ثانی روک دیا گیا ہے۔
بورڈ حکام کا کہنا ہے کہ یہ فیصلہ موجودہ سکیورٹی صورتحال اور علاقائی حالات کے پیش نظر کیا گیا ہے تاکہ طلبہ کی حفاظت کو یقینی بنایا جا سکے۔
ملتوی کیے گئے امتحانات کے نئے شیڈول کا اعلان بعد میں کیا جائے گا اور طلباء کو پیشگی اطلاع دی جائے گی۔
بورڈ حکام کے مطابق طلبہ اور والدین صورتحال سے پریشان نہ ہوں، امتحانات دوبارہ منظم شیڈول کے تحت لیے جائیں گے۔
فیڈرل بورڈ انتظامیہ کا کہنا ہے کہ بیرون ملک امتحانی مراکز کی صورتحال کا مسلسل جائزہ لیا جا رہا ہے اور حالات معمول پر آنے کے بعد امتحانات دوبارہ شروع کیے جائیں گے۔
