ہاکی کے سابق اولمپیئن شہناز شیخ کی زکریا یونیورسٹی ملتان آمد
قومی کھیل کے سابق اولمپیئن شہناز شیخ نے وائس چانسلر پروفیسر ڈاکٹر منصور اکبر کنڈی کے ساتھ ان کے آفس میں ملاقات کی ۔
اس موقع پر سابق صدر ہاکی ایسوسی ایشن ملتان حامد چوہدری ، منیجر میپکو ملتان وسیم اور آر او ڈاکٹر طاہر محمود بھی موجود تھے۔
سابق اولمپیئن شہناز شیخ نے وائس چانسلر کے ساتھ ہاکی کی یادوں کو تازہ کیا , اور اس بات پر زور دیا کہ سپورٹس کو شعبہ ایجوکیشن کے انڈر ہونا چاہیے تاکہ نوجوان طلباء طالبات شوق کے ساتھ ہاکی اور دیگر کھیلوں میں اپنی دلچسپی کا بھرپور مظاہرہ کرسکیں۔
شہناز شیخ نے زکریا یونیورسٹی میں آسٹروٹرف کی تنصیب پر مسرت کا اظہار کیا، اور کہاکہ یونیورسٹی اکیڈیمی بنائے تو میں اپنی خدمات فری آف کاسٹ دوں گا۔
انہوں نے کہاکہ ہاکی کا بڑا ٹیلنٹ ہے، اور میں اس کھیل کے فروغ کے لیے نوجوانوں کو مفت تربیت فراہم کرنے کے لیے ہر وقت تیار ہوں۔
وائس چانسلر پروفیسر ڈاکٹر منصور اکبر کنڈی نے شہناز شیخ کی خدمات کو سراہتے ہوئے کہاکہ قومی کھیل کے فروغ کے لیے یونیورسٹی میں آسٹروٹرف بچھا رہے ہیں، اور میں توقع کرتا ہوں کہ مستقبل ہاکی کا ہی ہوگا۔
ملاقات کے بعد زکریا یونیورسٹی سپورٹس کمپلیکس کے سامنے سابق اولمپیئن شہناز شیخ نے وائس چانسلر کے ہمراہ یادگاری پودا بھی لگایا۔
