کھیلتا پنجاب ویژن کے تحت جیل میں قیدیوں کے لئے کھیلوں کے سامان کی فراہمی
وزیر اعلیٰ پنجاب مریم نواز کے ‘کھیلتا پنجاب’ ویژن کے تحت جیل میں قید قیدیوں کو صحت مندانہ سرگرمیوں کی طرف راغب کرنے کے لیے پنجاب بھر کی مختلف جیلوں میں کھیلوں کی سہولیات فراہم کرنا شروع ہوگیا ہے۔
اس سلسلہ میں ڈسٹرکٹ سپورٹس آفیسر ملتان عدنان نعیم نے ڈسٹرکٹ جیل میں جگہ کے وزٹ کے بعد وہاں پر مختلف کھیلوں کا سامان بھی سپرنٹینڈینٹ ڈسٹرکٹ جیل ملتان عامر عمر قریشی کے حوالہ کیا۔
اس موقع پر ڈپٹی سپرٹنڈنٹ محمد علی بھی موجود تھے عدنان نعیم نے کہاکہ ڈسٹرکٹ سپورٹس ڈیپارٹمنٹ ملتان ہمیشہ سے کھلاڑیوں کو کھیلوں کی سہولیات فراہم کرنے میں پیش پیش رہا ہے، ہمارا بنیادی مقصد معاشرے کے ہر فرد کو کھیلوں کے میدان سے مستفید کراکے ایک صحت مند معاشرے کی تشکیل کرنا ہے۔
سپرٹینڈنٹ ڈسٹرکٹ جیل ملتان عامر عمر قریشی نے کہاکہ سپورٹس ڈیپارٹمنٹ کے مشکور ہیں جنہوں نے قیدیوں کے لیے کھیلنے کا سامان مہیاء کیا، جن سے ان کو مثبت سرگرمیوں میں حصہ لینے کا موقع ملے گا اور وہ جیل سے باہر جاکے معاشرے میں اپنی مثبت پہچان بنا سکیں گے۔
