میٹرک اور انٹرمیڈیٹ کا پرچہ سوشل میڈیا پر قبل از وقت مشتہر کرنا جرم قرار
ملتان سمیت پنجاب بھر کے تعلیمی بورڈز نے سوالیہ پرچہ یا اس کے متعلقہ معلومات کو سوشل میڈیا پر شیئر کرنے کو جرم قرار دے دیا ہے۔
نوٹیفکیشن کے مطابق امتحان کے دوران سوالیہ پرچے کی قبل از وقت تشہیر، شیئرنگ یا کسی بھی قسم کی معلومات عام کرنا سنگین جرم ہے قانون کے تحت یہ عمل قابلِ سزا جرم ہے۔
نوٹیفکیشن کے مطابق جو شخص امتحان میں پیش کیے جانے والے سوال یا سوالیہ پرچے کی قبل از وقت تشہیر کا مرتکب پایا گیا، اسے تین سال تک قید اور 50 ہزار روپے تک جرمانہ ہو سکتا ہے۔ اس کے علاوہ امتحانی عمل میں مداخلت یا معاونت کرنے والے افراد بھی قانون کی گرفت میں آئیں گے۔
حکام نے کہا ہے کہ امتحانات کے شفاف انعقاد کو یقینی بنانے کے لیے جدید مانیٹرنگ سسٹم اور سائبر نگرانی کا عمل جاری ہے، جبکہ کسی بھی خلاف ورزی کی صورت میں فوری قانونی کارروائی عمل میں لائی جائے گی۔
اس لئے تمام طلبا اور ان کے والدین امتحانی ضابطہ اخلاق کی مکمل پابندی کریں اور کسی بھی غیر قانونی سرگرمی کا حصہ نہ بنیں قانون کی خلاف ورزی کرنے والوں کے خلاف بلا امتیاز کارروائی کی جائے گی تاکہ امتحانی نظام کی شفافیت برقرار رکھی جا سکے۔
