ملتان ڈویژن کے ٹرائلز کا شیڈول جاری
لاہور میں منعقد ہونے والی رمضان المبارک سپورٹس سیریز کے لیے ملتان ڈویژن کے ٹرائلز کا شیڈول جاری کردیا گیا۔
سپورٹس اینڈ یوتھ افیئرز پنجاب کے زیر اہتمام تین اپریل سے لاہور میں منعقد ہونے والی رمضان المبارک سپورٹس سیریز 2023 کے سلسلہ میں ملتان ڈویژن کی ٹیموں کی تشکیل کے لیے ٹرائلز کا شیڈول جاری کرتے ہوئے رانا ندیم انجم ڈویژنل سپورٹس آفیسر ملتان نے بتایا کہ رمضان المبارک کے بابرکت مہینے میں کھلاڑیوں کو سرگرم عمل رکھنے کے لیے ڈویژنوں کے درمیان مقابلہ جات کا انعقاد کیا جارہا ہے۔
اس سلسلہ میں آج 31 مارچ کو گورنمنٹ ہائی سکول 107/10R جہانیاں میں کبڈی کے ٹرائلز، جبکہ یکم اپریل کو صبح دس بجے ہاکی ٹیم ٹرائلز ملتان ہاکی اسٹیڈیم میں، جبکہ دوپہر ڈھائی بجے سپورٹس کمپلیکس ملتان جمنیزیم میں مرد اور خواتین کھلاڑیوں کے بیڈمنٹن کے ٹرائلز، تین بجے جمنیزیم ملتان میں مرد اور خواتین کے ٹیبل ٹینس کے ٹرائلز جبکہ رات نو بجے فٹبال کی ٹیم کے لیے ٹرائلز فٹبال گراونڈ سپورٹس کمپلیکس ملتان میں منعقد ہونگے۔
ان ٹرائلز میں کامیاب مرد اور خواتین کھلاڑی لاہور میں تین اپریل سے شروع ہونے والی رمضان المبارک سیریز میں حصہ لینگے۔
واضح رہے کہ ان ٹرائلز میں ملتان ڈویژن سے تعلق رکھنے والے تمام عمر کے اور محکمہ جات کے کھلاڑی حصہ لے سکتے ہیں۔
