امریکا آنے والوں پر پابندیاں برقرار

واشنگٹن انتظامیہ نے امریکا آنے والے غیرملکیوں کے داخلے پر ایک اور پابندی عائد کرتے ہوئے بھارت سمیت دیگر ممالک پر سفری پابندیاں غیر معینہ مدت تک برقرار رکھنے کا فیصلہ کرلیا۔
امریکن میڈیا کا کہناہے کہ جوبائیڈن انتظامیہ نے امریکا جانے کے خواہش مند تمام غیرملکیوں کے داخلے کو ویکسین سے مشروط کردیا۔
امریکا میں داخل ہونے والے تمام غیرملکیوں کو منظور شدہ ویکسین لگوانی لازمی ہوگی، اور انہیں ایئرپورٹ پر اپنا ویکسین سرٹیفیکٹ بھی دکھانا ہوگا، جس کی تصدیق کے بعد انہیں داخل ہونے کی اجازت دی جائے گی۔
جبکہ ایسوسی ایٹ پریس آف امریکا نے دعویٰ کیا ہے کہ جو بائیڈن انتظامیہ نے امریکا آنے والے تقریباً تمام غیرملکیوں کو کرونا ویکسین لگوانے کا پابند کرنے کے لئے پہلا قدم اٹھا لیا ہے۔
دوسری جانب امریکا نے چین، شین گین، برطانیہ، آئرلینڈ، برازیل، جنوبی افریقا اور بھارت پر سفری پابندیاں غیرمعینہ مدت تک برقرار رکھنے کا فیصلہ کیا ہے۔
امریکا کی جانب سے جاری ہونے والی سفری گائیڈ لائنز میں بتایا گیا ہے کہ مسافروں کو امریکا روانگی سے 72 گھنٹے قبل کرونا ٹیسٹ کی منفی رپورٹ دکھانی ہوگی۔