پنجاب حکومت نے ضلع ملتان میں شاہراہوں کی تعمیر کے لئے خزانے کے منہ کھول دئے

ایکسین ہائی وے غلام نبی نے اس بارے محمکہ تعلقات عامہ ملتان کے افس میں گفتگو کرتے ہوئے بتایا کہ1ارب روپے کی لاگت سے سیداں والا بائی پاس بوسن روڈ سے دریائے چناب تک دورویہ شاہراہ کی تعمیرجاری ہے۔

اس منصوبے کی تکمیل سے بوسن روڈ سے ہیڈ محمد والا تک شاہراہ 80 فٹ چوڑی ہوجائے گی ، اور پراجیکٹ سے ملتان سے بھکر، لیہ اور تونسہ شریف کے درمیان مسافت کا وقت کم ہوجائے گا۔

انہوں نے بتایا کہ شیر شاہ سے نشتر ٹو شجاع آباد روڈ تک شجاع آباد کینال کے ساتھ 56 کروڑ روپے کی لاگت سے کیرج وے تعمیر کی جارہی ہے، جس سے ڈی جی خان سے نشتر ٹو اور موٹروے تک فاصلے سمٹ جائیں گے۔

غلام نبی نے بتایا کہ مظفر آباد میں نادر آباد فلائی اوور کی تعمیر پر2 ارب80 کروڑ روپے خرچ کئے جارہے ہیں، اور یہ فلائی اوور اپنی نوعیت کے حوالے سے ٹو سٹیج فلائی اوور ہوگا جس سے شیر شاہ، ملتان کینٹ اور انڈسٹریل اسٹیٹ کی جانب بیک وقت ٹریفک کو رواں رکھا جا سکے گا۔

انہوں نے بتایا کہ اس پراجیکٹ کا پائل ورک جاری ہے اور منصوبہ 2024 تک مکمل کرلیا جائے گا۔

ایکسین ہائی وے نے بتایا کہ کھاد فیکٹری سے متی تل کی جانب ضلع ملتان کی آخری حدود تک21 کلومیٹر طویل دو رویہ سڑک کی تعمیر کا کام جاری ہے، جس کی تعمیر پر2ارب 50 کروڑ روپے خرچ کئے جارہے ہیں۔

اس روڈ کا وومن یونیورسٹی تک کا حصہ مکمل کرلیا گیا ہے۔

انہوں نے مزید بتایا کہ ملتان شہر میں تغلق ٹاون فلائی اوور کی تعمیر پر1 ارب20 کروڑ روپے صرف کئے جارہے ہیں۔

غلام نبی نے بتایا کہ وزیر اعلی پرویز الہی کی ہدایت پر شجاع آباد سے جلال پور پیروالا تک کیرج وے منصوبے کی منظوری دے دی گئی ہے۔

اس میگا پراجیکٹ پر2 ارب50 کروڑ روپے خرچ کئے جائیں گے، اور منصوبے کا ٹینڈر جلد جاری کردیا جائے گا۔