ہارڈ شپ گراؤنڈ پر تبادلوں کے لیے ترمیم شدہ شیڈول جاری
محکمہ سکول ایجوکیشن نے اساتذہ کے ہارڈ شپ گراؤنڈ پر تبادلوں کے لیے ترمیم شدہ شیڈول جاری کر دیا ہے، جس کے تحت ویڈ لاک، معذور اساتذہ، سنگل پیرنٹس اور میڈیکل بنیادوں پر تبادلہ کروانے کے خواہشمند اساتذہ درخواست دینے کے اہل ہوں گے۔
محکمے کی جانب سے جاری کردہ شیڈول کے مطابق تبادلوں کے لیے آن لائن درخواستیں جمع کروانے کی آخری تاریخ 12 دسمبر مقرر کی گئی ہے، جبکہ موصول ہونے والی درخواستوں کی سکروٹنی کا عمل 22 دسمبر سے 27 دسمبر تک جاری رہے گا۔
ترمیم شدہ شیڈول کے تحت متعلقہ ڈیپارٹمنٹس کی ہارڈ شپ کمیٹیاں 29 دسمبر سے 3 جنوری تک درخواستوں کا تفصیلی جائزہ لیں گی اور میرٹ و قواعد و ضوابط کے مطابق فیصلے کیے جائیں گے۔
محکمہ سکول ایجوکیشن نے واضح کیا ہے کہ ہارڈ شپ کمیٹی سے تبادلوں کی منظوری کا عمل 10 جنوری تک مکمل کر لیا جائے گا، جبکہ جن امیدواروں کی درخواستیں مسترد ہوں گی وہ 12 سے 15 جنوری کے دوران اپیل دائر کرنے کے مجاز ہوں گے۔
ترجمان محکمہ سکول ایجوکیشن کے مطابق تمام مراحل کی تکمیل کے بعد اساتذہ کے تبادلوں کے احکامات 20 دسمبر کے بعد باقاعدہ طور پر جاری کیے جائیں گے، تاکہ شفاف اور بروقت انداز میں اساتذہ کو ریلیف فراہم کیا جا سکے۔
