اساتذہ و نان ٹیچنگ اسٹاف کی حاضری کی کڑی مانیٹرنگ، روزانہ گروپ تصویر لازمی قرار دے دی گئی

سرکاری سکولوں کے تدریسی و غیر تدریسی عملے کی حاضری اور وقت کی پابندی کو یقینی بنانے کے لیے محکمہ سکولز نے سخت اقدامات نافذ کر دیے ہیں۔

جاری کردہ مراسلے کے مطابق تمام پرائمری اور مڈل سکولوں کے ہیڈ ٹیچرز کو ہدایت کی گئی ہے کہ وہ روزانہ صبح 08:45 بجے تمام اساتذہ اور نان ٹیچنگ اسٹاف کی گروپ تصویر حاضری رجسٹر کے ہمراہ بنائیں، جن پر وقت، تاریخ اور لوکیشن کا واضح اندراج لازمی ہوگا۔

مزید ہدایت میں کہا گیا ہے کہ اسسٹنٹ ایجوکیشن آفیسر تمام سکولوں سے موصول ہونے والی تصاویر کو یکجا کر کے ایک پی ڈی ایف فائل کی صورت میں روزانہ صبح 09:30 بجے تک واٹس ایپ کے ذریعے متعلقہ دفتر کو ارسال کریں گے۔