تعلیمی اداروں میں موسم سرما کی تعطیلات پر سختی سے عملدرآمد کا حکم

سی ای او ایجوکیشن اتھارٹی ملتان نے موسم سرما کی تعطیلات کے حوالے سے واضح اور سخت نوٹیفکیشن جاری کر دیا ہے۔

نوٹیفکیشن کے مطابق تعطیلات کے دوران کسی بھی سرکاری یا نجی تعلیمی ادارے کے کھلنے پر مکمل پابندی عائد ہوگی۔

اعلامیے میں خبردار کیا گیا ہے کہ موسم سرما کی تعطیلات کے دوران اگر کوئی سکول کھلا پایا گیا تو متعلقہ سکول انتظامیہ کے خلاف سخت قانونی اور تادیبی کارروائی عمل میں لائی جائے گی۔

اس ضمن میں اسسٹنٹ ایجوکیشن افسران اور ڈپٹی ایجوکیشن افسران کو روزانہ کی بنیاد پر مانیٹرنگ کی ہدایت بھی جاری کر دی گئی ہے تاکہ حکومتی احکامات پر مکمل عملدرآمد یقینی بنایا جا سکے۔

سی ای او ایجوکیشن اتھارٹی نے واضح کیا ہے کہ بچوں کی صحت اور حفاظت کے پیش نظر تعطیلات پر کسی قسم کی کوتاہی برداشت نہیں کی جائے گی۔