چھٹیوں کے فیصلے پر عملدرآمد کےلئے پرائیویٹ سکولز کی سخت نگرانی کرنے کا فیصلہ

محکمہ سکولز نے موسم گرما کی تعطیلات میں اضافے کے بعد فیصلے پر عملدرآمد یقینی بنانے کےلئے پرائیویٹ سکولوں کی سخت نگرانی کا فیصلہ کیا ہے اور تمام فیلڈ افسران کو ہدایت جاری کردی گئی ہے کہ حکومت کے طے کردہ احکامات پر ہر صورت عملدرآمد یقینی بنائیں گے۔

ذرائع کا کہنا تھا کہ تمام اضلاع میں ایسے تمام نجی اسکولز جو حکومتی احکامات کو نظر انداز کر رہے ہیں یا بندش کے باوجود کھلے ہیں، ان کے خلاف موقع پر سخت کارروائی کی جائے گی اور فوری طور پر سیل کر دیا جائے گا۔

اس کےلئے سی ای او آفس میں ایک کمپلینٹ سیل بھی قائم کیا جارہا ہے تاکہ والدین، شہری اور دیگر متعلقہ افراد فوری شکایات درج کرا سکیں۔

حکام کا کہنا ہے کہ کسی قسم کی نرمی برداشت نہیں کی جائے گی اور احکامات کی خلاف ورزی پر متعلقہ اسکول انتظامیہ کے خلاف قانونی کارروائی عمل میں لائی جائے گی۔