سیکرٹری سکولز نے چارج سنبھال لیا
محکمہ سکول ایجوکیشن جنوبی پنجاب کے نئے تعینات ہونے والے سیکرٹری رانا سلیم احمد خان نے اپنے عہدے کا چارج سنبھال لیا ہے۔
چارج سنبھالنے کے بعد انہوں نے محکمہ کے افسران اور دیگر سٹاف کے ساتھ اپنے تعارفی اجلاس میں محکمہ سکول ایجوکیشن کے مختلف منصوبوں اور انیشی ایٹوز بارے بریفنگ لی۔
اس موقع پر ایڈیشنل سیکرٹری (ایڈمن) سروش فاطمہ شیرازی نے سیکرٹری سکول ایجوکیشن جنوبی پنجاب کو سکولوں اور طلبہ کی تعداد، آؤٹ آف سکول چلڈرن، ٹرانس جینڈر سکول پراجیکٹ، صبح نو سکول، سٹوڈنٹ کونسل، سکول ہاکی لیگ، سکول اولمپکس، فروغ پروگرام، چلڈرنز گرین بک اور سٹوڈنٹس پرفارمنس ایویلیوشن اینڈ ٹریکنگ سسٹم کے حوالے سے تفصیلی بریفنگ دی۔
سیکرٹری سکول ایجوکیشن جنوبی پنجاب رانا سلیم احمد خان نے کہا کہ سکول ایجوکیشن کے موجودہ انفراسٹرکچر کے مطابق وسائل کا درست استعمال کیا جائے، اور سکولوں میں کوالٹی آف ایجوکیشن بڑھانے پر فوکس کیا جائے۔
انہوں نے کہا کہ جنوبی پنجاب کی آبادی کی لحاظ سے سکولوں کی تعداد کا تناسب تیار کیا جائے تاکہ زیادہ آبادی والے علاقوں میں تعلیمی سہولیات کو ممکن بنایا جا سکے۔
تعارفی اجلاس میں ڈپٹی سیکرٹریز خواجہ مظہر الحق، سیف اللہ خان، محمد فیصل شہزاد، اسسٹنٹ اکاؤنٹس آفیسر شبیر احمد، سیکشن آفیسرز محمد جمشید خان، حنا چوہدری، میاں صدیق احمد، قرۃ العین، اللہ رکھا اور مانیٹرنگ افسران شریک تھے۔
واضح رہے کہ محکمہ سکول ایجوکیشن جنوبی پنجاب میں نئے تعینات ہونے والے سیکرٹری رانا سلیم احمد قبل ازیں سیکرٹری ہاؤسنگ اربن ڈویلپمنٹ اینڈ پبلک ہیلتھ جنوبی پنجاب کے طور پر فرائض سر انجام دے رہے تھے۔
