صوبے بھر کے سکولوں میں ایمرجنسی نافذ
سکیورٹی خدشات کے پیشِ نظر محکمہ سکولز نے صوبے بھر کے اسکولوں میں اہم اور فوری نوعیت کے اقدامات کا اعلان کر دیا ہے۔
جاری ہدایات کے مطابق تمام اسکولوں میں صبح کی اسمبلی کو تا حکمِ ثانی معطل کر دیا گیا ہے تاکہ طلبہ کے بڑے اجتماعات سے گریز کیا جا سکے، تمام اساتذہ کو ہدایت کی ہے کہ وہ فوری طور پر سیف سٹی ایپ ڈاؤن لوڈ کریں تاکہ کسی بھی ہنگامی صورتحال میں متعلقہ اداروں کو بروقت اطلاع دی جا سکے۔
اس اقدام کا مقصد اسکولوں اور قانون نافذ کرنے والے اداروں کے درمیان رابطے کو مؤثر بنانا ہے۔
اس کے علاوہ تمام سرکاری و نجی اسکولوں میں نصب سی سی ٹی وی کیمروں کو مکمل طور پر فعال رکھنے کے احکامات جاری کیے گئے ہیں۔
متعلقہ حکام کو ہدایت کی گئی ہے کہ کیمروں کی کارکردگی یقینی بنائی جائے اور نگرانی کا نظام مؤثر رکھا جائے۔
محکمہ تعلیم نے ایجوکیشن اتھارٹیز کو اسکولوں کے اکاؤنٹس میں فوری فنڈز منتقل کرنے کی ہدایت بھی جاری کی ہے تاکہ سکیورٹی انتظامات میں کسی قسم کی مالی رکاوٹ پیش نہ آئے۔
مزید برآں تمام اسکولوں کو فوری طور پر سکیورٹی گارڈ تعینات کرنے اور ان کی ڈیوٹی مرکزی گیٹ پر لگانے کا حکم دیا گیا ہے، ہدایات میں کہا گیا ہے کہ اسکولوں میں باقاعدہ ایمرجنسی ڈرلز کروائی جائیں اور طلباء کو ہنگامی حالات سے نمٹنے کے حوالے سے عملی مشق اور آگاہی فراہم کی جائے۔
اساتذہ کو بھی ہدایت کی گئی ہے کہ وہ طلبہ کو کسی بھی احتجاج یا جلوس میں شریک نہ ہونے دیں۔
