یونیورسٹی آف بہاولنگر بنانے کی تیاریاں شروع

اسلامیہ یونیورسٹی بہاولپور کے سب کیمپس کو اپ گریڈ کرکے یونیورسٹی آف بہاولنگر بنانے کافیصلہ ،پی سی ون طلب کرلیا گیا۔

تفصیل کے مطابق پنجاب حکومت نے سب کیمپسز کو اپ گریڈ کرکے یونیورسٹیاں بنانے کاسلسلہ جاری رکھنے کا فیصلہ کیا ہے، جس کے لئے خصوصی فنڈز بھی مختص کردئیے ہیں اور اسی کے تحت یونیورسٹی آف بہاولنگر قائم کی جارہی ہے۔

اس سلسلے میں وائس چانسلر اسلامیہ یونیورسٹی بہاولپور، کو جاری مراسلے میں کہاگیاہے کہ وزیر اعلیٰ کی نئی سکیم جس کانام "چیف منسٹر انیشی ایٹو فار اسٹیبلشمنٹ/ موجودہ یونیورسٹیوں کے ذیلی کیمپسز کے اپ گریڈیشن” رکھا گیا اور اس مد میں دو ارب روپے بھی مختص کئے گئے ہیں۔

محکمہ ہائیر ایجوکیشن ڈیپارٹمنٹ نے بہاولنگر میں واقع اسلامیہ یونیورسٹی بہاولپور کے سب کیمپس کو ‘یونیورسٹی آف بہاولنگر’ کے نام سے ایک یونیورسٹی میں اپ گریڈ کرنے کی تجویز دی ہے ۔

اس لئے اس سکیم کے تحت سب کیمپس کو اپ گریڈ کرنے کےلئے پی سی ون آئندہ 24 گھنٹوں میں جمع کرائیں تاکہ منصوبے کا آغاز ہوسکے۔