’اتحادیوں کے ساتھ عدم اعتماد کی تحریک جیتیں گے‘:عمران خان

وزیراعظم عمران خان کا کہنا ہے کہ اتحادیوں کے ساتھ عدم اعتماد کی تحریک جیتیں گے۔

وزیراعظم عمران خان کی زیر صدارت سیاسی کمیٹی کا اجلاس ہوا ، جس میں انہیں صدارتی ریفرنس سے متعلق سماعت پر بریفنگ دی گئی۔
وزیراعظم نے کیس کی پیروی پر اطمینان کا اظہار کیا۔

وزیراعظم نے کہا کہ ہم عدم اعتماد کی تحریک میں جیت رہے ہیں، اتحادی میرے ساتھ ہی رہیں گے۔

انہوں نے کہا کہ انشا اللہ ہارس ٹریڈنگ کو ختم کرکے چھوڑیں گے، کرپشن قبول کرلی تو معاشرہ تباہ ہوجائے گا، معاملہ حق اور باطل کا ہی نہیں آنے والی نسلوں کا بھی ہے۔

عمران خان نے کہا کہ اپوزیشن کے نمبرز پورے نہیں ہوں گے، تحریک عدم اعتماد کامیاب نہیں ہوگی آخری دم تک مافیا کا مقابلہ کریں گے۔

ان کا کہنا تھا کہ یہ اپوزیشن کی غلط فہمی ہے میں دباؤ میں آجاؤں گا، 27 مارچ کو عوام بتا دیں گے وہ کس کے ساتھ ہیں۔

واضح رہے کہ وزیر اعظم عمران خان کی زیرِ صدارت گزشتہ روز سیاسی کمیٹی کے ہونے والے اجلاس میں اتحادی جماعتوں سے رابطے جاری رکھنے کا فیصلہ کیا گیا تھا۔

گزشتہ روز حکومتی ٹیم نے ایم کیو ایم پاکستان کے وفد سے اہم ملاقات کی تھی۔
اسپیکر قومی اسمبلی اسد قیصر، وزیر دفاع پرویز خٹک اور وزیر منصوبہ بندی اسد عمر پر مشتمل وفد پارلیمنٹ لاجز پہنچا اور ایم کیو ایم ارکان کو وزیر اعظم عمران کا پیغام پہنچایا تھا۔

ملاقات میں مثبت پیشرفت ہوئی اور دونوں اطراف سے ملاقاتیں جاری رکھنے پر اتفاق کیا گیا تھا۔