زرعی یونیورسٹی میں پولیو کے حوالے سے سیمینار کا انعقاد

ایم این ایس زرعی یونیورسٹی اور روٹری کلب کے زیر اہتمام پولیو کے عالمی دن کے حوالے سے آگاہی سیمینار کا انعقاد کیا گیا۔

پولیو ڈے کے مہمان خصوصی میاں سلمان مبارک تھے۔

پولیو کا عالمی دن منانے کا بنیادی مقصد طلباء کے ذریعے معاشرے میں پولیو کی بیماری کے بارے میں آگاہی دینا تھا۔

میاں سلمان مبارک نے خطاب کرتے ہوئے کہا کہ پولیو عموما 5سال تک کی عمر میں لاحق ہو سکتا ہے، اور اسی وجہ سے بچہ یا فرد نہ صرف تاحیات معذور ہو سکتا ہے بلکہ بیماری کی شدت کی وجہ سے موت کے منہ میں بھی جا سکتا ہے۔

انہوں نے مزید کہا کہ ہم سب کی ذمہ داری سے پولیو ختم کیا جا سکتا ہے۔

یہ ہمارے لئے افسوس کا مقام ہے کہ ساری دنیا میں صرف دو ممالک ایسے ہیں جہاں سے پولیو ابھی تک ختم نہیں ہو سکا۔بدقسمتی سے پاکستان بھی ان میں شامل ہے۔اس وقت پاکستان میں پولیو کو بہت حد تک کنٹرول کر لیا گیا ہے، اور اللہ کے فضل و کرم سے جلد ہی اس بیماری سے مکمل طور پر نجات مل جائے گی۔

پولیو سروائیور نادر خان نے پولیو کے حوالے سے بات کرتے ہوئے کہا کہ اس بیماری کا علاج نہیں ہے، اس سے صرف بچا جاسکتا ہے اور اس سے بچنے کا واحد حل پولیو کی ویکسینیشن ہے۔

انہوں نے مزید اس بات پر زور دیا کہ معذور افراد کو معاشرے کا مفید شہری بنانے میں ہم سب کو اپنا کردار ادا کرنا چاہیے۔

سینئر ٹیوٹر ڈاکٹر عثمان جمشید نے کہا کہ رئیس جامعہ پروفیسر ڈاکٹر آصف علی (تمغہ امتیاز)کے ویژن کے مطابق جامعہ کی اسٹوڈنٹ سوسائٹیز معاشرے میں بہتری کے لیے اپنا کردار ادا کر رہی ہیں۔

اس موقع پر ڈاکٹر سلمان قادری،ڈاکٹر عمیر وقاص، جنید اور طلباء و طالبات کی کثیر تعداد موجود تھی۔