ایمرسن یونیورسٹی کا ایک ارب 19 کروڑ کا سر پلس بجٹ پیش کردیا گیا
وائس چانسلر ڈاکٹر محمد رمضان نے ایمرسن یونیورسٹی ملتان میں مالی سال 2024-25 کے لیے 5ویں فنانس اور پلاننگ کمیٹی کے اجلاس کی صدارت کی، خزانہ دار یمرسن یونیورسٹی، ندیم مشتاق نے اجلاس کے سیکرٹری کے طور پر ایجنڈا پیش کیا۔
اجلاس میں ڈاکٹر محمد فاروق، پروفیسر ڈاکٹر حیات اعوان سنڈیکیٹ ممبر اور ڈاکٹر عبدالمعید، ایڈیشنل خزانچی ایمرسن یونیورسٹی شامل تھے۔
اجلاس میں ایمرسن یونیورسٹی کا 1196.83 ملین بغیر خسارے کا بجٹ پیش کیا گیا اور منظوری بھی دی جب کہ کل وسائل کا تخمینہ 1493.722 ملین روپے ہے، یہ متوازن بجٹ اگلے مالی سال کے لیے 281.891 ملین روپے کے بجٹ سپورٹ، پنشن فنڈ کے لیے 5 ملین روپے کی شراکت، اور یونیورسٹی انڈونمنٹ فنڈ کے لیے 10 ملین روپے کی شراکت شامل ہے، یہ فنڈز یونیورسٹی کی پائیداری اور ابھرتی ہوئی ضروریات کو پورا کرنے کے لیے وقف ہیں۔
بجٹ میں کمپیوٹر لیبز اور سائنسی لیبارٹریوں ۔سائنسی تحقیق اور تعلیمی سرگرمیوں کے لئے خطیر رقم رکھی گئی ۔مالی سال 2023-24 کے دوران کل متوقع اخراجات 855.070 ملین روپے تھے جب کہ متوقع وسائل 912.991 ملین روپے تھے۔ تاہم، سخت مالیاتی نظم و ضبط اور کفایت شعاری کے اقدامات کے ذریعے، اخراجات کے نظر ثانی شدہ تخمینے کو 454.754 ملین روپے تک کم کیا گیا، اور وسائل کو 962.122 ملین روپے تک بڑھایا گیا، جس سے 507.368 ملین روپے کی بچت ہوئی۔
نئے پروگراموں کے لیے بجٹ کی منظوری بھی دی گئی۔ نئے پروگراموں میں ملٹی میڈیا اور گیمنگ، کمپیوٹر انجینئرنگ، ای کامرس، انٹرپرینیورشپ، میتھ ود انفارمیشن ٹیکنالوجی، میتھ ود آرٹیفیشل انٹیلیجنس، میتھ ود ڈیٹا سائنسز، ڈیٹا اینالیٹکس، فرانزک سائنس، فلم، ٹی وی اینڈ ویژول آرٹس، کرمنالوجی، سوشل ورک، ٹیکسٹائل اینڈ فیشن ڈیزائننگ شامل ہیں۔
اس کے علاوہ، مالی سال 2024-25 کے لیے پوسٹس کے قیام اور خاتمے کے بجٹ کی منظوری بھی دی گئی۔کمیٹی نے کمرشل بینکوں میں پنجاب حکومت کی پالیسی کے مطابق فنڈز کی سرمایہ کاری اور پلیسمنٹ کی منظوری بھی دی۔
ایمرسن یونیورسٹی ملتان کے انڈونمنٹ فنڈ کے قواعد کی منظوری اور ایمرسن یونیورسٹی کے ملازمین کو اسپیشل الاؤنس 2021 دینے کی منظوری بھی اجلاس کے اہم نکات میں شامل تھیں۔
اس موقع پر وائس چانسلر نے جنوبی پنجاب میں ایمرسن یونیورسٹی کو تیزی سے ترقی دینے کے لیے کی گئی متعدد اقدامات کا ذکر کیا، ان میں 56 نئے اعلیٰ تعلیم یافتہ فیکلٹی ممبران کی تعیناتی، مارکیٹ اورینٹڈ پروگرامز، 71 شارٹ کورسز، لرن ٹو ارن پروگرامز، کیمپس مینجمنٹ سسٹم، فیکلٹی بائیو میٹرک فیشل اٹینڈنس، ایئر کنڈیشنڈ کلاس رومز، ٹیچر اور اسٹوڈنٹ ٹریننگ پروگرامز، اسپورٹس سرگرمیاں، اور ثقافتی فیسٹیول شامل ہیں۔
ڈاکٹر رمضان نے یونیورسٹی کے مین گیٹ، واٹر کینال سسٹم، کمپیوٹر لیب، ٹی وی اسٹوڈیو، انڈونمنٹ فنڈ، ہاسٹل کی مرمت، اور فلٹریشن پلانٹس کی تعمیر میں عطیہ دہندگان اور سابق طلباء کے کردار کو بھی سراہا۔
انہوں نے بتایا کہ وہ طلباء کی توانائی کو مثبت طریقے سے استعمال کرنے اور انہیں کھیلوں کی روح کے بارے میں آگاہ کرنے پر بھی توجہ مرکوز کر رہے ہیں۔
