میپکو ملازمین روڈ پر آگئے
آل پاکستان واپڈا ہائیڈرو الیکٹرک ورکرز یونین سی بی اے کے مرکزی جنرل سیکرٹری خورشید احمد کی ہدایات پر ریجنل چیئرمین میپکو چوہدری غلام رسول گجر کی قیادت میں میپکو ہیڈکوارٹر کے باہر مطالبات کے حق میں اور جانیں قربان کرنے والوں کی یاد میں یوم شہدا منایا گیا۔
چوہدری غلام رسول گجر نے خطاب کرتے ہوئے وفاقی وزیر توانائی سے مطالبہ کیا کہ میپکو کے لائن سٹاف کو محفوظ اور صحت مند حالات کرنے کے لیے فوری طور پر محکمہ جاتی اصلاحات کریں،گزشتہ ساڑھے پانچ سال سے کوئی بھرتی نہ ہوئی ہے،جنگی بنیادوں پر بھرتی کی جائے۔
میپکو ملازمین صبح آٹھ بجے سے رات بارہ بجے تک مسلسل ڈیوٹیاں سر انجام دے رہے ہیں، ہفتہ اور اتوار کو بھی انہی اوقات کے ساتھ ڈیوٹیاں کروائی جا رہی ہیں،اتھارٹی سے مطالبہ ہے کہ لیبر /ملازمین کو اتوار والے دن آرام دیا جائے۔
ریجنل سیکرٹری چوھدری محمود امجد نے کہا مطلوبہ ملازمین نا ہونے کی وجہ سے انہیں دہرا کام ذہنی دباؤ کے ساتھ کرنے پر آئے روز المناک حادثات ہو رہے ہیں، اس وجہ سے پورے ملک میں 60 سے زیادہ لائن مین شہید اور اس سے کہیں زیادہ دوران ڈیوٹی شدید زخمی ہو چکے ہیں۔
ریجنل چیئرمین ریونیو شکیل بلوچ،ریجنل ڈپٹی چیئرمین سجاد بلوچ نے کہا کہ ہم حکومت وقت سے مطالبہ کرتے ہیں کہ وہ ملازمین کو محکمانہ فرائض ادا کرنے کے دوران جان لیوا حادثات سے محفوظ رکھنے کے لیے موثر اقدامات کریں۔
چوہدری محمد خالد،رانا محمد انور نے کہا ملک میں مہنگی بجلی کو سستا کرانے کے لیے نجی پاور ہاؤسز (آئی پی پیز) کی بجلی کے بھاری ریٹ کم کرائے۔
راشد یامین اور رانا زاہد جاوید نے خطاب کرتے ہوئے کہا ملک میں ضروریات زندگی کی اشیاء اور کمر توڑ مہنگائی میں اضافہ کو ممکنہ حد تک کم کرنے کے لیے موثر قدامات کیے جائیں۔
رانا مظہر لطیف اور طارق صدیقی نے کہا ملک میں بے روزگاری کی وجہ سے غربت میں دن بدن اضافہ ہو رہا ہے۔ جاگیر داروں اور سرمایہ کاروں پر ٹیکس عائد کریں، کسانوں کی بہبود کے لیے زرعی اصلاحات نافذ کریں
