ڈی ای او سکینڈری ملتان کا تبادلہ معمہ بن گیا
عدلیہ کے آرڈر کے برعکس ڈسٹرکٹ ایجوکیشن آفیسر سیکنڈری ملتان کے ریلیونگ آرڈر جاری کئے جانے کا انکشاف
بتایا گیا ہے کہ سرنڈر کئے جانے پر ڈسٹرکٹ ایجوکیشن آفیسر سیکنڈری ملتان نے ہائیکورٹ سے سٹے آرڈر لیا، عدالت عالیہ نے چیف سیکرٹری پنجاب کو معاملے کا فیصلہ کرنے کا حکم دیا اور ابھی چیف سیکرٹری پنجاب نے کوئی فیصلہ نہیں کیا۔
لیکن ملتان کے ایک اعلیٰ آفیسر تعلیم نے ڈی ای او شیخ رفیق احمد کو ریلیو کروادیا۔
بتایا گیا ہے کہ ڈی ای او شیخ رفیق احمد کو ایک مخصوص سیاسی جماعت کی الیکشن مہم چلائے جانے پر تحفظات تھے، اور انہوں نے مختلف افسران، سکولز سربراہان اور اساتذہ کو بھی برملا یہ کہہ دیا تھا کہ ہمارا کام درس وتدریس ہے، ہمارا کام کسی سیاسی پارٹی کی انتخابی مہم چلانا نہیں ہے، اس پر ان کے اعلیٰ آفیسر تعلیم کے ساتھ اختلافات چل رہے تھے۔
اس پر ایک با اثر سیاسی لیڈر کے ذریعے شیخ رفیق احمد کو پہلے سرنڈر اور اب ریلیو کردیا گیا ہے، حالانکہ ابھی چیف سیکرٹری پنجاب نے ہائیکورٹ کے حکم کے مطابق فیصلہ کرکے ہائیکورٹ کو رپورٹ پیش کرنی ہے۔
تعلیمی حلقوں نے صورتحال پر تشویش ظاہر کرتے ہوئے چیف جسٹس آف پاکستان وزیر اعظم، وزیر اعلیٰ پنجاب سے اس صورتحال کا نوٹس لینے کا مطالبہ کیاہے۔
اس حوالے سے رابطہ کرنے پر محکمہ تعلیم کے حکام نے موقف دینے سے گریز کیا۔
