زکریا یونیورسٹی میں لائبریری کا وقت کم کرنے پر طلباء کا احتجاج
زکریا یونیورسٹی کی سنٹرل لائبریری کا وقت کم کرنے اور سٹاف خود کم کرکے ملازمین نہ ہونے کا بہانہ کرنے پر یونیورسٹی طلباء نے گزشتہ روز سنٹرل لائبریری کے باہر احتجاج کیا ، اور شدید نعرے بازی کی۔
اس موقع پر طلباء کا کہنا تھا کہ لائبریری کا ٹائم پہلے رات دس بجے تک تھا ، لیکن موجودہ چیف لائبریرین فضل الٰہی نے اس کے اوقات کار شام چار بجے تک کر دیئے، جبکہ پنجاب یونیورسٹی میں لائبریری کا ٹائم رات بارہ بجے تک ہے۔
طلباء کا کہنا تھا کہ یونیورسٹی سے فری ہونے اور رات کو کھانے کے بعد اکثر وہ لائبریری میں پڑھنے کے لئے آتے تھے، لیکن اس کا ٹائم شام چار بجے تک کر دیا گیا ہے، ویسے ہی اتنی گرمی میں دن میں یونیورسٹی سے فری ہونے کے بعد وہ اکثر گرمی کی وجہ سے اپنے کمروں سے باہر نہیں نکلتے، اور رات کے وقت ہی ان کو پڑھنے کا موقع ملتا ہے، اس لئے یونیورسٹی انتظامیہ کو چاہیئے کہ وہ اس معاملے کا نوٹس لیں اور لائبریری کا ٹائم رات دس بجے تک کیا جائ،ے اور تبدیل کئے گئے ملازمین کو واپس لایا جائے تاکہ طلبہ اپنی پڑھائی کو جاری رکھ سکیں۔
اس بارے میں یونیورسٹی ذرائع سے معلوم ہوا ہے کہ لائبریری میں سٹاف کم تھا، اور چیف لائبریرین نے وہاں سے بھی ملازمین کے تبادلے کر دیئے ہیں ، جسکی وجہ سے اوقات کار کم کئے گئے ہیں۔
