جنوبی پنجاب کے سکولوں میں 38 لاکھ پودے لگانے کا ہدف مقرر
سیکرٹری اسکول ایجوکیشن جنوبی پنجاب ڈاکٹر عبیداللہ کھوکھر نے کہا ہے کہ موسمی تغیرات سے نبرد آزما ہونے کے لیے وسیع پیمانے پر شجر کاری ناگزیر ہے، ایک درخت کی زندگی کروڑوں انسانوں کی زندگی ہے، محکمہ اسکول ایجوکیشن جنوبی پنجاب نے "ایک استاد ایک درخت”، "ایک طالب علم ایک درخت” کی پالیسی وضع کرتے ہوئے جنوبی پنجاب کے سرکاری سکولوں میں 38 لاکھ سے زائد پودے لگانے کا ہدف مقرر کیا ہے۔
وہ ایجوکیشن سیکرٹریٹ جنوبی پنجاب میں شجر کاری کے دوران میڈیا سے گفتگو کر رہے تھے، اس موقع پر ایڈیشنل سیکرٹری خواجہ مظہر الحق، ڈی پی آئی (سکینڈری) جنوبی پنجاب زاہدہ بتول اور سیکشن آفیسر شبیر احمد بھی ان کے ہمراہ تھے۔
سیکرٹری اسکول ایجوکیشن جنوبی پنجاب نے شجر کاری کے عمل میں اساتذہ اور طلباء و طالبات کی شمولیت کو ناگزیر قرار دیتے ہوئے کہا کہ شجر کاری مہم کے دوران جنوبی پنجاب کے سرکاری اسکولوں میں 105022 اساتذہ اور 37 لاکھ 73 ہزار 313 طلباء و طالبات کی مدد سے مجموعی طور پر 38 لاکھ 78 ہزار 335 پودے لگائیں گے۔
انہوں نے مزید کہا کہ محکمہ اسکول ایجوکیشن جنوبی پنجاب نے موسمی تبدیلی اور ماحولیاتی آلودگی کے حوالے سے طلباء میں آگہی پیدا کرنے اور سر سبز و شاداب ماحول کی اہمیت اجاگر کرنے کے لیے میاواکی جنگل اگانے اور سرکاری سکولوں میں گرین بک کی تدریس کا عمل شروع کیا، یہ تمام اقدامات کامیابی سے جاری ہیں۔
