کالجز میں شجر کاری کا دائرہ کار وسیع کرنے کا حکم
محکمہ ہائیر ایجوکیشن جنوبی پنجاب کی طرف سے خطے کے کالجز کو سرسبز و شاداب بنانے اور طلباء کو شجر کاری کی اہمیت و افادیت سے آگاہ کرنے کے لیے گرین کمپی ٹیشن کا انعقاد، سیکرٹری ہائیر ایجوکیشن جنوبی پنجاب محمد الطاف بلوچ نے کلین اینڈ گرین جنوبی پنجاب کے تحت کالجز میں شجرکاری کا دائرہ کار وسیع کرنے کا حکم جاری کر دیا۔
تفصیلات کے مطابق محکمہ ہائیر ایجوکیشن جنوبی پنجاب کی طرف سے کلین اینڈ گرین جنوبی پنجاب پراجیکٹ اور خطے کے کالجز میں شجر کاری فروغ کے جامع منصوبے پر عمل درآمد کے لیے کالج کی سطح پر گرین کمپی ٹیشن مقابلوں کا انعقاد کرایا گیا۔
اس حوالے سے تبادلہ خیال کرتے ہوئے سیکرٹری ہائیر ایجوکیشن جنوبی پنجاب الطاف بلوچ نے کہا کہ گرین کمپی ٹیشن پروگرام کے تحت جنوبی پنجاب کے کالجز میں پھولوں کی نمائش، جامن، آم، امرود، انار اور دیگر پھل دار درختوں کے پودے لگوانے اور ہر پودا کالج کے کسی نہ کسی طالب علم کے نام معنون کرنے کی پالیسی اپنائی گئی ہے۔
انہوں نے کہا کہ گرین کمپی ٹیشن کے دوران ہر پودا کالج کے کسی نہ کسی طالب علم کے نام معنون کیا گیا ہے تاکہ اس طالب علم میں احساس ذمہ داری اور اعتماد پیدا ہو اور وہ اپنے نام کے پودے کی لگن اور اپنائیت کے ساتھ دیکھ بھال کر سکے۔
