ویمن یونیورسٹی ملتان میں جشن بہاراں شروع ہوگیا
ڈائریکٹوریٹ آف سپورٹس ویمن یونیورسٹی ملتان اور پاپولیشن ویلفیئر ڈیپارٹمنٹ کے اشتراک سے جشن بہاراں شروع ہوگیا۔
ترجمان کے مطابق ویمن یونیورسٹی کے کچہری کیمپس میں موسم بہار کےمناسبت سے جشن بہاراں شروع ہوگیا جس میں روایتی کھانوں کے سٹال، دستکاری اور آرٹ کے سٹال لگائے گئے ہیں۔
جشن بہاراں میلہ اور سپورٹس گالا کا افتتاح وائس چانسلر پروفیسرڈاکٹر کلثوم پراچہ نے کیا افتتاحی تقریب سے خطاب کرتے ہوئے انہوں نے کہا کہ بہار کا موسم خدا کا دیا ہوا وہ تحفہ ہے، جس کی اہمیت سے انکار ممکن نہیں ہے، یہ موسم اپنے ساتھ رنگوں کی بارات لے کر آتا ہے، جس کی خوبصورتی سے ہر انسان اپنے اپنے انداز میں لطف اندوز ہوتا ہےبہار کا خوبصورت اور دلفریب موسم پوری فضا کو بے شمار پھولوں کی خوشبو اور رنگوں سے معطر اور رنگین کر دیتا ہے۔
ویمن یونیورسٹی نے بھی اپنی روایت کے مطابق جشن بہاراں میلہ کا انعقاد کیا کیونکہ یہ روایتی میلے ہماری ثقافت کا حصہ رہے ہیں جو لوگوں کو جوڑنے میں بھی مددگار ہوتے تھے مگر تیز رفتار ترقی کے دوڑ نے ہمیں اپنے کلچر سے دور کردیا اپنے روایتی تہوار اور کھیل ہمارے زندگی سے نکل گئے، مگر ویمن یونیورسٹی نے اپنے کلچر کی طرف سفر کرنے کافیصلہ کیا اس میلے کا مقصد مقامی ثقافت اور روایات کا احیاء ہے، ایسی سرگرمیاں طالبات کو نہ صرف ذہنی اور جسمانی طور پر بڑھنے میں مدد دیتی ہیں بلکہ انہیں اپنی ماضی کی روایات سے بھی جوڑتی ہیں۔
انہوں نے کہا کہ طالبات کو روایتی کھیلوں جیسے کرکٹ،رسہ کشی ، بیڈمنٹن اور ثقافتی ٹیبلو کے ساتھ ساتھ سائنس اور پھولوں کی نمائش، مشاعرہ، قوالی اور ورائٹی شو جیسے مقابلوں میں حصہ لیتے ہوئے دیکھ کر خوشی ہوئی ہے، ایسی تقریبات کے انعقاد سے طالبات میں خود اعتمادی کی صلاحیتیں اجاگر ہوتی ہے۔
سپورٹس کے طالبات نے مختلف پرفارمنس پیش کی، وائس چانسلر پروفیسر ڈاکٹر کلثوم پراچہ اور رجسٹرار ڈاکٹر میمونہ خان نے تمام سٹالز کا وزٹ کیا۔
اس موقع پر خطاب کرتے ہوئے ڈائریکٹرسپورٹس پروفیسر ڈاکٹر میمونہ خان نے کہا کہ یونیورسٹی کھیلوں کے کلچر کو فروغ دینے کے لیے پرعزم ہے، طالبات کھیلوں کے میدانوں کی بجائے سکرین پر زیادہ وقت گزارنے کے رجحان کو چھوڑ دیں معاشرے میں کھیلوں کی سرگرمیوں کو فروغ دینے کی ضرورت ہے۔
جشن بہاراں منانے کا مقصدطالبات کو پڑھائی کے ساتھ ساتھ ان کی ذہنی اور کردار سازی کو بھی فروغ دینا ہے۔
پاپولیشن ویلفیئر آفیسر خضر حیات نے کہا کہ غیر نصابی سرگرمیاں طالبات کی سماجی تربیت کے لیے ضروری ہیں۔
اس موقع پرکنٹرولر امتحانات ڈاکٹر حنا علی، ڈسٹرکٹ پاپولیشن ویلفیئر آفیسر مسٹر خضر ، ڈپٹی ڈسٹرکٹ آفیسر پاپولیشن ویلفیئر محمد حسن، ڈائریکٹر اکیڈمکس ڈاکٹر مریم زین سمیت تمام چیئرپرسنز بھی موجود تھیں۔
