زرعی یونیورسٹی ملتان : “انوویٹو جوس میکنگ مقابلہ” کا انعقاد
محمد نواز شریف زرعی یونیورسٹی میں ڈیپارٹمنٹ آف ہوم سائنسز اور بزنس انکوبیشن سینٹر کے زیر اہتمام “انوویٹو جوس میکنگ مقابلہ” کا انعقاد کیا گیا، جس کا مقصد طلبہ میں تخلیقی صلاحیتوں، غذائی آگاہی اور عملی مہارتوں کو فروغ دینا تھا۔
اس ایونٹ سے طلبہ کو ایک متحرک پلیٹ فارم فراہم کیا جہاں وہ صحت بخش اور فنکشنل مشروبات تیار کرنے میں اپنی جدت کا مظاہرہ کر سکیں۔
طلبہ نے بھرپور شرکت کرتے ہوئے خوبصورت اور دلکش اسٹالز لگائے، جن میں تازہ پھلوں کے جوسز، سبزیوں پر مبنی مشروبات اور صحت بخش اجزاء سے بھرپور فنکشنل ڈرنکس شامل تھیں۔
مصنوعات کی تنوع، معیار اور تخلیقی انداز نے طلبہ کی غذائیت، فوڈ سائنس اور پراڈکٹ ڈویلپمنٹ کے حوالے سے مضبوط سمجھ کی عکاسی کی۔اس پروگرام کا بنیادی مقصد طلبہ میں جدید سوچ کو فروغ دینا اور انہیں اپنے نظریاتی علم کو عملی طور پر استعمال کرنے کا موقع فراہم کرنا تھا۔ اس کے ذریعے طلبہ کو فوڈ سیفٹی، صفائی کے اصولوں اور مختلف اجزاء کی غذائی اہمیت کے بارے میں بہتر سمجھ حاصل ہوئی۔
اس سرگرمی سے طلبہ نے مشروبات کی تیاری، پیشکش اور ذائقہ جانچنے (سینسری ایویلیوایشن) کا عملی تجربہ حاصل کیا۔ایونٹ میں بطور مہمانِ خصوصی اور جج، محمد مدثر تھے۔ ان کی پیشہ ورانہ جانچ اور تعمیری رائے نے شرکاء کے لیے سیکھنے کے قیمتی مواقع فراہم کیے۔
وائس چانسلر پروفیسر ڈاکٹر آصف علی نے بھی ایونٹ کا دورہ کیا، طلبہ کی کاوشوں کو سراہا اور اس بات پر زور دیا کہ اس قسم کی عملی اور جدت پر مبنی تعلیمی سرگرمیاں جاری رہنی چاہئیں، جو نظریہ اور صنعت کے درمیان خلا کو کم کرتی ہیں۔
مزید برآں اس مقابلے نے طلبہ میں ٹیم ورک، ابلاغی صلاحیتوں اور خود اعتمادی کو فروغ دیا۔ ہر گروپ نے بہترین ہم آہنگی، تخلیقی پیشکش اور مؤثر برانڈنگ کا مظاہرہ کیا۔ اس سرگرمی نے طلبہ کو مارکیٹ کے رجحانات، صارفین کی ترجیحات اور کم لاگت پیداوار کی اہمیت سے بھی آگاہ کیا۔ طلبہ نے غذائیت سے بھرپور اور کم خرچ مشروبات تیار کرنے کی صلاحیت حاصل کی، جو مستقبل میں کاروباری مواقع میں بھی تبدیل ہو سکتی ہے۔
ججز کی رائے سے طلبہ کو اپنی کمزوریوں کو سمجھنے اور اپنی مہارتوں کو مزید بہتر بنانے کا موقع ملا۔ایونٹ کے اختتام پر نمایاں کارکردگی دکھانے والے طلبہ کو ان کی بہترین کارکردگی، جدت اور مصنوعات کے معیار کی بنیاد پر انعامات سے نوازا گیا۔مجموعی طور پر یہ ایونٹ نہایت کامیاب اور مؤثر ثابت ہوا۔
اس موقع پر پروفیسر ڈاکٹر عمر فاروق،ڈاکٹر عمبرین ناز،ڈاکٹر شبیر احمد ،مصباح شریف سمیت دیگر فیکلٹی ممبران اور طلبہ و طالبات کی کثیر تعداد موجود تھی۔
