پیکٹا نے نویں کلاس کے چار نئے مضامین کی پیئرنگ تیار کرلی
پنجاب ایجوکیشن کریکولم، ٹریننگ اینڈ اسیسمنٹ اتھارٹی پیکٹانے نویں جماعت کے چار مضامین زرعی علوم ، صحت کے علوم فیشن ڈیزائننگ اور اطلاعاتی و مواصلاتی ٹیکنالوجی کے لیے عملی ماڈل پیپرز اور جوڑی اسکیم حتمی شکل دے دی ہے۔
یہ ماڈل پیپرز بورڈز آف انٹرمیڈیٹ اینڈ سیکنڈری ایجوکیشن کو بھجوائے گئے ہیں اورویب سائٹ پر جاری کر دیے گئے ہیں ۔
جاری سکیم کے مطابق زرعی علوم کے عملی پرچے میں کل 35 نمبر اور 2 گھنٹے کا وقت ہے۔ طلبہ کو دو سوالوں میں سے ہر ایک میں دو میں سے ایک عملی کرنے کا اختیار ہوگا۔
پہلے سوال میں ربیع اور خریف کی فصلوں کے بیجوں کی شناخت یا مویشیوں و مرغیوں سے حاصل ہونے والی مصنوعات کی نشاندہی کرنی ہوگی۔
دوسرے سوال میں پتوں کی مدد سے پودوں کی شناخت یا لییکٹومیٹر سے دودھ میں ملاوٹ جانچنی ہوگی۔ عملی نوٹ بک 6 اور ویوا وائس 5 نمبروں پر مشتمل ہوگی۔صحت کے علوم کے پرچے میں بھی 35 نمبر اور 2 گھنٹے ہیں۔
پہلے سوال میں طلبہ پھیپھڑوں کی ہوا ناپ سکیں گے یا پلس آکسیمیٹر سے آکسیجن کی مقدار معلوم کر سکیں گے۔ دوسرے سوال میں بلڈ پریشر ناپنے یا موچ پر فرسٹ ایڈ کے طریقے دکھانے ہوں گے۔
دیگر مشقوں میں نظام تنفس، نبض کی شرح، سی پی آر، زخموں کی ڈریسنگ، اور خوراک میں میکرو نیوٹرینٹس کی شناخت شامل ہےفیشن ڈیزائننگ کے عملی پرچے میں تخلیقی صلاحیتوں کو جانچا جائے گا۔
پہلے سوال میں فیشن پیٹرن کے لیے پانچ قسم کی لکیریں اور دو بنیادی جیومیٹرک شکلیں بنانا یا کلر وہیل بنا کر پرائمری اور سیکنڈری کلرز کی نشاندہی کرنی ہوگی۔
دوسرے سوال میں فیمیل فیشن فگر اور اس پر کیژوئل ڈریس ڈیزائن کرنا یا سلائی کے چار ضروری اوزاروں کے نام اور افعال لکھنے ہوں گے۔ مشقوں میں پاکستانی صوبوں کی ثقافتی شناخت، ہڑپہ اور موئن جو دڑو کے ملبوسات، بلوچستان کے کڑھائی کے نمونے، اور سلائی مشین کے پرزے شامل ہیں۔
اطلاعاتی و مواصلاتی ٹیکنالوجی کے پرچے میں طلبہ کو کمپیوٹر پر عملی کام کرنا ہوگا اور مراحل جوابی شیٹ پر تحریر کرنے ہوں گے۔ پہلے سوال میں پریزنٹیشن سافٹ ویئر میں تین سلائیڈز (جدول اور چارٹ کے ساتھ) ڈیزائن کرنا یا بیٹری، سوئچ اور ریزسٹر سے ایل ای ڈی سرکٹ بنانا ہے۔
دوسرے سوال میں ای کامرس پلیٹ فارم پر اکاؤنٹ سیٹ اپ کرنا یا اے آئی ٹولز سے بزنس آئیڈیا، نام، لوگو اور نعرہ تیار کرنا ہے۔ دیگر مشقوں میں ورڈ پروسیسنگ، گرافک ڈیزائننگ (کینوا، پوسٹر پریپ)، ایچ ٹی ایم ایل میں ویب پیج، فارم ویلڈیشن، بوٹ ایبل اینٹی وائرس، اور AI ٹولز سے آن لائن مواد تیار کرنا شامل ہے ۔
پیکٹا حکام کا کہنا ہے کہ یہ ماڈل پیپرز اور جوڑی اسکیم طلبہ و اساتذہ کے لیے رہنمائی کا ذریعہ ہیں تاکہ عملی امتحانات کی تیاری یکساں اور معیاری ہو سکے۔ تمام دستاویزات آفیشل ویب سائٹ پر اپ لوڈ کر دی گئی ہیں۔
ماہرین تعلیم کے مطابق ان جدید اور عملی مضامین کو شامل کرنا طلبہ میں ہنرمندی اور روزگار کے مواقع بڑھانے کے لیے اہم قدم ہے۔
واضح رہے کہ یہ ماڈل پیپرز صرف نویں جماعت کے لیے ہیں اور متعلقہ بورڈز انہیں اپنے دائرہ اختیار میں لاگو کریں گے۔
