موسم گرما اور موسم سرما کی تعطیلات میں کمی کی سفارش
تعلیمی سال کے دوران چھٹیوں کی کثرت کے باعث تدریسی وقت میں نمایاں کمی کے مسئلے پر قابو پانے کے لیے محکمہ تعلیم نے اہم تجاویز پر غور شروع کر دیا ہے، جن کے تحت موسم گرما اور موسم سرما کی تعطیلات میں کمی کی سفارش کی گئی ہے۔
ذرائع کے مطابق مجوزہ پلان کے تحت موسم گرما کی چھٹیوں میں 15 سے 20 دن جبکہ موسم سرما کی تعطیلات میں 5 سے 6 دن تک کمی کی تجویز زیرِ غور ہے۔
حکام کا کہنا ہے کہ موجودہ تعلیمی کیلنڈر میں تعطیلات کی زیادہ تعداد کے باعث نصاب کی بروقت تکمیل میں مشکلات پیش آتی ہیں، جس سے طلبہ کی تعلیمی کارکردگی متاثر ہوتی ہے۔
تعلیمی ماہرین کے مطابق اگر چھٹیوں میں متوازن کمی کی جائے تو نہ صرف تدریسی دورانیہ بڑھایا جا سکتا ہے بلکہ طلبہ کو بہتر سیکھنے کے مواقع بھی فراہم کیے جا سکتے ہیں۔
ان کا کہنا ہے کہ عالمی معیار کے مطابق تعلیمی سال میں تدریسی دنوں کی ایک مخصوص تعداد ہونی چاہیے، جسے برقرار رکھنا ضروری ہے۔
دوسری جانب والدین اور اساتذہ کی رائے بھی اس حوالے سے لی جا رہی ہے تاکہ کوئی بھی حتمی فیصلہ تمام اسٹیک ہولڈرز کی مشاورت سے کیا جا سکے۔ بعض حلقوں نے گرمی کی شدت کے پیش نظر موسم گرما کی چھٹیوں میں بڑی کمی پر تحفظات کا اظہار بھی کیا ہے۔
حکام کے مطابق تجاویز کو حتمی شکل دینے کے بعد نئی پالیسی کا اعلان کیا جائے گا، جس کا اطلاق آئندہ تعلیمی سال سے متوقع ہے۔
